Aktorë e regjisorë në Tiranë protestojnë kundër ndërhyrjes së politikës

“Do të bëjmë kërkesë në Parlament për amendament ku të thuhet që lidershipi nuk emërohet, por zgjidhet nga komunitetit”

Aktorët shqiptarë kanë protestuar në ambientet e Teatrit Kombëtar në Tiranë, duke thënë se ministria nuk e kupton se çfarë është artisti.

“Refleksionet nga qeveria e ministria duket që janë të vakëta, të mos themi të ftohta. Këtu nuk e kuptojnë në thelb çfarë është artisti. Ky është vlerësimi që i bën shteti shqiptar këtyre artistëve. Neve na fusin në vrimën e miut, atje në hidrocentral, se hajdutët nuk na lënë lekë”, thotë aktori Bujar Asqeriu.

Ndërsa Stefan Çapaliku ka kërkuar që zgjedhja e lidershipit të institucioneve kombëtare kulturore  të ndryshojë. Ai ka thënë se politika ka kontroll mbi teatrin, duke e quajtur këtë absurd të madh. “Do të bëjmë kërkesë në Parlament për amendament ku të thuhet që lidershipi nuk emërohet, por zgjidhet nga komunitetit”, tha Stefan Çapaliku.

Ndërsa regjisori Altin Basha thotë se artistët nuk lejohen të hyjnë në sallën e teatrit për të mbajtur deklaratë. Basha ka kërkuar që ministrja e Kulturës, Mirela Kumbaro, t’i vizitojë ata në teatër. Kjo përgjigje u bë pasi ministrja i ftoi ata në një takim për të mërkurën.