“The Guardian” rendit Tiranën ndër qytetet më miqësore për fëmijët

"Përkundër zërit të një minorance që protestoi për ndërtimin e këndit të lojërave te Liqeni Artificial, shumica fitoi, ndërsa thekson se në të gjithë qytetin janë ndërtuar 31 kënde të reja lojërash"

Mediumi prestigjioz “The Guardian” e ka renditur kryeqytetin shqiptar, Tiranën, në mesin e qyteteve më miqësore për fëmijët.

Kjo listë përbëhet edhe nga qytete të njohura si Rotterdam, Bogotas, Lexington e Vancouver.

Në artikullin e saj, “The Guardian” shkruan se përkundër zërit të një minorance që protestoi për ndërtimin e këndit të lojërave te Liqeni Artificial, shumica fitoi, ndërsa thekson se në të gjithë qytetin janë ndërtuar 31 kënde të reja lojërash, që dikur kanë qenë hapësira të zëna nga ndërtimet informale, transmeton “Top-Channel”.

Artikulli i kushton një vëmendje edhe sheshit “Skënderbej” dhe nismave të Bashkisë së Tiranës për ditët pa makina, të cilat kanë sjellë një ulje të nivelit të ndotjes së PM 10 me 15%.

Gjithashtu, “The Guarian” përmend se ndryshe nga shumë shtete të tjera në botë të cilat ngrenë mure, Tirana po ndërton një mur me pemë që po rrethon qytetin për më shumë oksigjen.

“The Guardian” shton se Tirana mburret me “këshillin e qytetit për fëmijët”, ku përfaqësuesit e rinj takohen me kryebashkiakun, debatojnë, ndërsa citojnë kryetarin Erion Veliajn që i cilëson ata si “avokatët më të mirë për të bindur prindërit e tyre për të ricikluar, për të ecur dhe për të shkuar me biçikletë në shkollë”.