Mbi 1850 hektarë tokë janë përmbytur në rrethin e Shkodrës

Bashkia e Shkodrës njofton se situata nga përmbytjet vazhdon të jetë e përkeqësuar, pasi reshjet e shiut kanë vazhduar. Në njoftimin për media thuhet se në lagjen “Zadrimë”, në fshatin Shirq kanë mbetur të bllokuara nga uji 17 familje.

Kjo komunë njofton se nga shiu dhe shkarkimet nga hidrocentralet e kaskadës së Drinit deri tani janë përmbytur rreth 1850 hektarë tokë, përcjell albinfo.ch.

Nga përmbytjet më së shumti kanë pësuar kulturat bujqësore, ku mbi 400 ha janë përmbytur. Po ashtu, edhe në njësinë administrative Ana e Malit situata vijon të përkeqësohet.

“Në Obot kalimi bëhet i mundur me varka. Niveli i ujit ka shënuar rritje dhe ka tendencë rritjeje në mënyrë të vazhdueshme. Mbi 1200 ha tokë janë të përmbytura: fshati Muriqan 420 ha, fshati Oblikë 580 ha, fshati Obot 200 ha. Nga sipërfaqet e mësipërme, sipërfaqja e mbjellë me kultura bujqësore vlerësohet në 890 ha”, thuhet në njoftim.