Zhdukja misterioze e Fitim Allajbegut

Zhdukja e tij daton që nga viti 2014, ndërsa hetimet kanë të bëjnë me Italinë, Zvicrën, Belgjikën dhe Floridën në SHBA dhe ka depërtuar në dosjen e Interpolit

Prokuroria e Hal-Vilvorde në Belgjikë, nga fillimi i muajit ka filluar hetimet lidhur me zhdukjen e afaristit 56-vjeçar shqiptar nga Maqedonia, Fitim Allajbegu.

Ai ka qenë aktiv në negociatat për ari dhe diamant në mes të Brukselit dhe Kinshasës. “Tashmë kanë filluar hetimet lidhur me rastin”, ka konfirmuar zëdhënësi Carol Vercarre, për të përditshmen belge “La Dernière Heure”, përcjell albinfo.ch.

Shqiptari nga Maqedonia ka qenë shumë i njohur si sportist në vendlindje. Zhdukja e tij daton që nga viti 2014, ndërsa hetimet kanë të bëjnë me Italinë, Zvicrën, Belgjikën dhe Floridën në SHBA dhe ka depërtuar në dosjen e Interpolit.

Nyja fillon në Shkup, ku Fitim Allajbegu ishte i njohur si nipi i legjendës së lavdishme të mundjes nga trojet e ish-Jugosllavisë, Mentaz Allajbegu, i cili me nxënësit e tij fitoi disa medalje olimpike.

Xhaxhai i tij e themeloi klubin e mundjes “Liria”, shkolla e famshme e mundjes në Shkup, prej nga kanë dalë disa kampionë.