Patriarku Kirill vlerëson bashkëjetesën e shqiptarëve, takohet me Ilir Metën

Lideri shpirtëror i rreth 250 milion ortodoksëve në botë, Patriarku Kirill (71), ka çmuar lartë bashkëjetesën fetare të shqiptarëve, gjatë takimit me presidentin Ilir Meta, informon albinfo.ch.

Patriarku Kirill po qëndron prej të shtunës në një vizitë zyrtare në Shqipëri. Ai ka vlerësuar punën e jashtëzakonshme të Kryepeshkopit Anastas në veçanti 71 vjeçari shprehu mirënjohjen edhe për të gjithë drejtuesit e besimeve fetare në vend, që e nderuan gjatë kësaj vizite.

Ndërsa presidenti Meta, në vlerësim të kësaj vizite historike, nënvizoi mesazhet e rëndësishme që ajo përcjell, në dobi të paqes, mirëkuptimit, solidaritetit e harmonisë fetare. Ai vlerësoi kontributin e Patriarkut Kirill në funksion të këtij misioni universal, referuar edhe takimit historik të Havanës, së dy viteve më parë, mes tij dhe Atit të Shenjtë, Papa Franceskut dhe mesazheve të përbashkëta që ata përcollën, jo vetëm për besimtarët e krishterë por për mbarë njerëzimin.

Presidenti Meta theksoi se roli i besimeve fetare është i pazëvendësueshëm për paqen, bashkëjetesën dhe harmoninë midis popujve dhe kombeve.

Patriarku Kirill kishte vizituar Shqipërinë edhe përpara 15 viteve, pak pas hapjes së vendit. Ai më vonë pritet të takojë edhe kryeministrin shqiptar Edi Rama.