11 vite burg babait që vrau foshnjën e tij

Natën e kobshme, ai ka qenë i vetëm me foshnjën në banesë, pasi bashkëshortja kishte udhëtuar në Bazel për t’u furnizuar me lëndë narkotike

Një prind 37-vjeçar nga Laufenburgu në Gjermani, është dënuar me njëmbëdhjetë vite burg, pasi gjatë festës të Krishtlindjeve e ka vrarë fëmijën e tij.

Ngjarja i kishte tronditur banorët në rrethinë. Ditën e parë të Krishtlindjeve, babai 37-vjeçar e ka keqtrajtuar aq shumë foshnjën e tij dy muaj e gjysmë, sa që ajo ka ndërruar jetë menjëherë.

Babai e ka hedhur disa herë foshnjën nëpër dhomë, pasi nuk ka mundur ta durojë, shkruajnë mediat gjermane, përcjell Albinfo.ch.

Gjatë kësaj, ka qenë nën ndikim të lëndëve narkotike, të cilat ka filluar t’i përdorë që në moshën 18-vjeçare.

Natën e kobshme, ai ka qenë i vetëm me foshnjën në banesë, pasi bashkëshortja kishte udhëtuar në Bazel për t’u furnizuar me lëndë narkotike. Pasi foshnja kishte filluar të qajë pandërprerë, i pandehuri nuk ka mundur më ta durojë duke e keqtrajtuar në mënyra të ndryshme, në mes të tjerash edhe duke e përplasur për dyshemenë e kuzhinës.

Për shkak të dëmtimeve në kokë, foshnja ka ndërruar jetë në vendngjarje. Pas kësaj, i pandehuri e ka thirrur policinë duke e pranuar veprën, që më pastaj të arrestohej nga policia pa ndonjë rezistencë.