Shkarkohet prokurori Besim Hajdarmataj i dosjes “Tahiri”

Me urdhër të kryeprokurores së Shqipërisë, Arta Marku, është larguar nga detyra e kreut të Prokurorisë së Krimeve të Rënda, Besim Hajdarmataj, ndërsa në vend të tij është emëruar Donika Prela.

Prokurorja Prela, që prej muajit janar mbante detyrën e kryeprokurores në Prokurorinë e Durrësit, detyrë e cila i është ngarkuar Anita Jellës.

Në një njoftim për mediat, Prokuroria e Përgjithshme thotë se ky ndryshim në drejtim do të sjellë si rezultat ndjekje penale më të shpejtë dhe më të efektshme të çështjeve me përparësi të lartë, përcjell albinfo.ch.

Besim Hajdarmataj është njëri prej prokurorëve që heton dosjen “Habilaj-Tahiri”. Ndaj këtij ndryshimi kanë reaguar ashpër drejtuesit e opozitës në Shqipëri duke thënë se ky është akti i fundit i Ramës për ta shpëtuar ish-ministrin Sajmir Tahirin.

Nënkryetari i Partisë Demokratike, Edi Paloka thotë se gjithçka e paralajmëruar nga PD po vërtetohet. Sipas tij, Rama kapi prokurorinë për të shpëtuar Tahirin dhe kokën e tij.

Ndërsa kryetarja e LSI-së, Monika Kryemadhi, deklaroi se shkarkimi i paligjshëm i Kryeprokurorit të Krimeve të Rënda është rasti me flagrant i Edi Ramës dhe veglës së tij në Prokurorinë e Përgjithshme.

Në një postim në “Facebook”, Kryemadhi thekson se largimi i tij nga detyra është qartas përpjekje për të mbyllur përfundimisht çështjen “Tahiri”, e cila mban peng jo vetëm Edi Ramën, por të gjithë qeverinë.