Të rinjtë e Tiranës shpërndajnë llampa ekologjike

Disa të rinj, për të falënderuar qytetarët që kishin zgjedhur biçikletën si mjet lëvizës, u dhuruan atyre llampa LED, miqësore me mjedisin

Kryetari i Bashkisë së Tiranës, Erion Veliaj, ka thënë se mënyra më e mirë për të festuar Ditën Botërore të Mjedisit është të japësh një kontribut konkret në mbrojtje të ambientit. Sipas tij, mbjellja e mbi 120 mijë pemëve, nisma për reduktimin e qeseve plastike dhe shtimi i korsive të biçikletave e kanë kthyer Tiranën në një qytet miqësor me mjedisin.

“Ardhja e biçikletave të para Mobike do të sjellë një revolucion në mënyrën se si do të lëvizim në Tiranë, duke qenë se përdorimi sa më shumë i tyre do të ndikojë drejtpërdrejt në uljen e ndotjes në kryeqytet”, ka thënë ai në një aktivitet që u shënua për Ditën Botërore të Mjedisit.

Disa të rinj, të shpërndarë në pika të ndryshme të Tiranës, zgjodhën një mënyrë origjinale për të falënderuar qytetarët që kishin zgjedhur biçikletën si mjet lëvizës, duke iu dhuruar atyre, në shenjë mirënjohje, llampa LED, miqësore me mjedisin, e që kursejnë energji, si dhe nga një çantë beze për të zëvendësuar qeset plastike.