Pakistani njeh Republikën e Kosovës

”Ne kemi marr sot konfirmimin zyrtar të njohjes nga Pakistani, dhe jemi ne pritje të njohje verbale e cila pritet të vijë”, tha zëdhënësi i MPJ-së, Artan Behrami

Njëri nga shtetet më të mëdha islamike në botë, Republika e Pakistanit ka konfirmuar njohjen e Republikës së Kosovës shtet të pavarur, duke e  ngritur në 99, numrin e shteteve që njohin realitetin e ri në Evropë. Këtë njohje e kanë konfirmuar zyrtarë të Ministrisë së Jashtme të Kosovës, të cilët thonë se janë në pritje të notës verbale.

Zëdhënësi i MPJ-së, Artan Behrami ka thënë se Pakistani e ka konfirmuar njohjen e pavarësisë së vendit. ”Ne kemi marr sot konfirmimin zyrtar të njohjes nga Pakistani, dhe jemi ne pritje të njohje verbale e cila pritet të vijë në Ministrinë e Punëve të Jashtme”, ka thënë Behrami, raporton RTK.

Sipas MPJ-së, shefi i diplomacisë kosovare, Enver Hoxhaj në takimin e Këshillit të Ministrave të Jashtëm të Organizatës së Bashkëpunimit Islamik, në Xhibuti, ka zhvilluar edhe një takim të veçantë me ministren e Punëve të Jashtme të Pakistanit, Hina Rabbani Khar, nga i cili ka kërkuar njohjen e Kosovës.

Gjatë këtij takimi, ministri Hoxhaj, siç thuhet, kishte marrë premtimin se Pakistani shumë shpejt do ta njoh Kosovën e pavarur.

Republika e Pakistanit ka rreth 160 milionë banorë , ndërsa është njëri nga shtetet më të mëdha islamike. Kjo njohje ka një rëndësi të veçantë për Republikën e Kosovës, për shkak të ndikimit që ka ky shtet tek vendet tjera islamike. Kjo është njohja e 99-të e Kosovës nga shtetet që janë anëtare të OKB-së.