Sërish kolona të gjata në Merdarë dhe Konçul

Sipas policisë kufitare, pritjet në Merdarë po zgjasin nga dy deri tri orë, ndërsa në pikëkalimin e Konçulit nga tri deri katër orë

Zbatimi i marrëveshjes për Menaxhimin e Integruar të Kufirit ndërmjet Kosovës dhe Serbisë nuk po jep rezultate të prekshme. Të paktën këtë marrëveshje nuk e kanë ndier bashkatdhetarët kosovarë të cilët kanë pritur me orë të tëra në pikëkalimet kufitar të Merdarës dhe të Dheut të Bardhë gjatë ardhjes dhe kthimit për në diasporë.

Departamenti i Policisë Kufitare, ka njoftuar të shtunën se në këto dy pikëkalime, janë krijuar kolona dhe pritje të gjata në dalje nga Republika e Kosovës për në Serbi. Këto pritje po u shkaktojnë vonesa bashkatdhetarëve të cilët këtë vikend, pas festave të fundvitit, po kthehen në vendet e tyre të punës. .

Sipas policisë kufitare, pritjet në këtë kohë në dalje të pikë kalimit kufitar Merdarë po zgjasin nga dy deri tri orë, ndërsa në pikëkalimin e Konçulit pritjet po zgjasin nga tri deri katër orë dhe kolonat janë
të gjata deri në tri kilometra.

Sipas burimeve të RTK-së, kolonat e gjata po krijohen edhe për shkak të neglizhencës së autoriteteve kufitare serbe.

“Në pikë kalimin kufitar Dheu i Bardhë pritjet e gjata i ka krijuar edhe ndërprerja e punës së përkohshme nga pala serbe për shkak të vendosjes së një kontejneri në atë vend kalim kufitar, ku ajo ndërprerje tani ka përfunduar”, thuhet në njoftim.

Policia e Kosovës, ndërkaq siç thuhet, ka ngritur kapacitetet e veta të punës duke angazhuar zyrtarë policor shtesë, me qëllim të përshpejtimit të punës dhe krijimit të mundësisë së qarkullimit më të shpejtë dhe evitimin e pritjeve të gjata të qytetarëve.