Më shumë udhëtarë në aeroportet e Maqedonisë

Gjatë vitit të kaluar nga aeroportet në Maqedoni janë regjistruar gjithsej 906.871 pasagjerë, që paraqet një rritje prej 8,7 për qind në krahasim me numrin e pasagjerëve në vitin 2011

Sipas Ministrisë së Transportit dhe Lidhjeve të Maqedonisë kjo rritje e pasagjerëve është shënuar në aeroportin “Aleksandri i Madh” në Shkup, ku vitin e kaluar janë transportuar 828.831 pasagjerë që është për 9,1 për qind më shumë krahasuar me numrin e pasagjerëve në vitin 2011.

Gjithashtu, rritje prej 5 për qind në krahasim me vitin paraprak është shënuar edhe në aeroportin “Shën Apostoll Pavle” në Ohër, ku vitin e kaluar janë transportuar 78.040 pasagjerë.

Rritje më të madhe ka në numrin e pasagjerëve të linjave të rregullta, që është meritë e vendosjes së destinacioneve të reja të drejtpërdrejta.

Në linjat e rregullta në vitin 2012 janë regjistruar 715.183 pasagjerë, që është për 13 për qind më shumë se nga viti 2011 kur në linjat e rregullta kanë udhëtuar 632.970 pasagjerë.

“Pas realizimit të projektit për modernizim të sistemit të aeroporteve të Maqedonisë përmes rrugës së koncesionit, është shënuar rritje e vazhdueshme e numrit të pasagjerëve dhe fluturimeve dhe të kompanive të cilat operojnë në destinacionet e reja. Gjithashtu, rritje plotësuese e pasagjerëve është mundësuar me implementimin e Projektit të Qeverisë për mbështetje financiare për dhe nxitje dhe zhvillim të komunikacionit ajror”, thuhet në kumtesën nga Ministria e Transportit dhe Lidhjeve.