BERZH premton investime në infrastrukturë të Kosovës

Përfaqësuesit e BERZH-it janë interesuar për investim në infrastrukturën rrugore, në projektet e ujësjellësit, trajtimin e ujërave të zeza dhe në menaxhimi e mbeturinave

Përfaqësuesit e Bankës Evropiane për Rindërtim dhe Zhvillim (BERZH) kanë shprehur interesim për të financuar disa projekte në fushat e infrastrukturës në Kosovë. Ata janë interesuar për investim në infrastrukturën rrugore, në projektet e ujësjellësit, trajtimin e ujërave të zeza dhe në menaxhimi e mbeturinave të ngurta.

Kështu të paktën ka deklaruar Jean-Marc Peterschmitt, drejtor Menaxhues për Evropën Qendrore dhe JugLindore. Ai e ka njoftuar kryeministri Hashim Thaçi dhe Ministri i Zhvillimit Ekonomik, Besim Beqaj për strategjinë tri vjeçare të BERZH-it për Kosovën si dhe rreth fushave ku BERZH-i synon ti shtrijë aktivitetin e vet.

Kryeministri Kosovës, Hashim duke diskutuar për prioritetet strategjike të Qeverisë së Republikës së Kosovës përfshirë këtu sektorin e energjisë, të infrastrukturës rrugore dhe atë të bujqësisë, theksoi se duhet të punohet intensivisht për fillimin e projekteve dhe shprehi gatishmërinë e Qeverisë për bashkëpunim.

Përfaqësuesit e lartë të BERZH-it e informuan kryeministrin Thaçi për prioritetet e identifikuara në bashkëpunim me Qeverinë e Republikës së Kosovës në kuadër të Strategjisë për Partneritetit me Republikën e Kosovës.

Përfaqësuesit e BERZH-it shprehën interesimin e tyre për të përkrahur procesin e privatizimit të PTK-së dhe projektin Kosova e Re. Ata sipas një kumtese lëshuar nga Kryeministria, kanë shprehur interesim edhe për përkrahjen e sektorit privat me asistencë teknike, si dhe investime në projekte.

Ndërsa ministri Beqaj tha se pas anëtarësimit të Republikës së Kosovës në këtë institucion financiar janë krijuar mundësitë më të mira për thellimin e bashkëpunimit në kuadër të Strategjisë të BERZH-it për Kosovën.

Ministri Beqaj ka njoftuar delegacionin e BERZH-it me prioritetet e Qeverisë sa i përket zhvillimit ekonomik dhe projektet që janë në proces e sipër, me theks të veçantë në fushën e energjetikës, infrastrukturës, telekomunikacionit etj.

Ai ka vënë në dukje se në kuadër të projekteve në fushën e energjisë, në fokus do të jenë projektet për rritjen efiçiencës së energjisë dhe zhvillimit të burimeve të ripërtërishme të energjisë, ndërsa theksoi se TC Kosova e Re mbetet ndër projektet kryesore në këtë sektor.