SHBA garanton tërësinë e territorit të Kosovës

Zëvendëspresidenti Biden tha se SHBA e ka përkrahur Kosovën në forcimin e shtetit, ndërsa garanton tërësinë territoriale të saj

Zëvendëspresidenti i Shteteve të Bashkuara të Amerikës (SHBA) Joseph Biden rikonfirmoi përkrahjen e plotë të Uashingtonit në agjendën evropiane të Republikës së Kosovës, si dhe në dialogun që Kosova po e bën me Serbinë për normalizimin e marrëdhënieve ndërmjet këtyre dy vendeve.

Zëvendëspresidenti Biden theksoi se SHBA do t’i japë përkrahje të fuqishme Republikës së Kosovës në të gjitha proceset demokratike. Këto komente ai i bërë gjatë një takimi që zhvilloi në Munih me presidenten e Kosovës, Atifete Jahjaga.

Zëvendëspresidenti Biden tha se SHBA e ka përkrahur Kosovën në forcimin e shtetit, ndërsa ka garantuar se pavarësia është proces i kryer dhe se Kosova sovranitetin dhe integritetin territorial i ka të sigurt.

Presidentja Jahjaga, ndërkaq e falënderoi zëvendëspresidentin dhe SHBA-të për angazhimin dhe për ndihmën që i kanë dhënë dhe po i japin konsolidimit të shtetit dhe të shoqërisë kosovare.

‘Ne jemi përjetësisht falënderues që duke na ndihmuar na keni dhënë shansin të jetojmë në liri, ndërsa tash e çmojmë lart mbështetjen që po na jepni në rrugën tonë drejt anëtarësimit në Bashkimin Evropian”, tha Jahjaga.

Republika e Kosovës, sipas saj, ka bërë progres të konsiderueshëm në këtë rrugë dhe tash është duke treguar vullnetin e mirë për normalizimin e marrëdhënieve me Republikën e Serbisë.

“Ne jemi të përkushtuar në këtë proces duke qenë thellësisht të bindur se animozitetet e së kaluarës të mos ia lëmë barrë gjeneratave të ardhshme”, tha presidentja Jahjaga.

Ajo tha se ka shprehur gatishmërinë që si Presidente e Kosovës të takohet me Presidentin e Serbisë, për t’i dhënë përkrahje dialogut ndërmjet dy qeverive, “në mënyrë që të normalizohen plotësisht marrëdhëniet ndërmjet dy shteteve të pavarura dhe sovrane”.