Kosova emëron konsullin e nderit në Japoni

Isao Iijima është emëruar Konsull Nderi në Japoni. Ai është një personalitet i shquar i jetës publike dhe akademike në Japoni dhe një mik i madh i Kosovës

Shefi i diplomacisë kosovare, Enver Hoxhaj ka emëruar të shtunën, Isao Iijima, në postin e Konsullit të Përgjithshëm Nderit të Republikës së Kosovës në Tokio të Japonisë. Isao Iijima është një personalitet i shquar i jetës publike dhe akademike në Japoni dhe një mik i madh i Kosovës dhe popullit të saj.

Vendimi i Ministrit Hoxhaj, siç thuhet në një komunikatë për media, është mirëpritur dhe pranuar nga Ministria e Punëve të Jashtme e Japonisë.

“Emërimi i z. Iijima në pozitën e Konsullit të Përgjithshëm të Nderit të Kosovës në Tokio, është hap i rëndësishëm në kuadër të orientimeve strategjike të politikës së jashtme të Kosovës, për të shtuar prezencën e gjithanshme në sa më shumë vende të botës, me qëllim të fuqizimit të vazhdueshëm të subjektivitetit ndërkombëtar të Republikës së Kosovës dhe dinamizimit të diplomacisë kosovare”, thuhet në
deklaratën e MPJ-së.

Emërimi i z. Iijima, sipas MPJ-së, është po ashtu hap i rëndësishëm në forcimin e gjithanshëm të marrëdhënieve bilaterale dhe thellimin e bashkëpunimit e të shkëmbimeve ndërmjet Republikës së Kosovës dhe Japonisë, si një ndër partnerët kryesor strategjik të Kosovës.