S’po dinë t’i qasen Diasporës!

Përfaqësuesit e Ministrisë së Diasporës shprehen të gatshëm për të bashkëpunuar me të gjithë ekspertët të cilët mund të japin kontributin e tyre në tërheqjen e investimeve

Diaspora kosovare posedon një potencial të mëdha ekonomik dhe financiar, por nuk ka mekanizma që i joshë mërgimtarët që të investojnë në Kosovë. Prandaj kërkohet krijimi i një grupi punues për të gjetur format e tërheqjes së ndërmarrësve nga diaspora.

Përfaqësuesit e Ministrisë së Diasporës shprehen të gatshëm për të bashkëpunuar me të gjithë ekspertët të cilët mund të japin kontributin e tyre në tërheqjen e investimeve.

Nga mërgata në Kosovë hynë shumë mjete financiare, por pjesa më e madhe e tyre del jashtë vendit. Prandaj, kërkohet të gjenden format që afro 600 milionë euro në vit sa vijnë nga diaspora, të mbeten në Kosovë dhe në këtë mënyrë të krijohet vlera e shtuar e atyre mjeteve.

Bardhyl Meta nga Oda Ekonomike Gjermane propozon të krijohet një grup punës për këtë qëllim.

“Është mirë të krijohet një grup i cili do të na përgjigjej brenda tre muajsh, si mund t’i tërheqim 10 mijë ndërmarrës nga diaspora, çka duhet të bëjmë, cila është pjesa e infrastrukturës ligjore që duhet ta ndërrojmë që ta arrijmë këtë stimulans dhe cilat janë efektet që na i sjell ajo”, tha Meta për mediet në Prishtinë.

Madje ai thotë se nuk është vështirë të sillen 10 mijë ndërmarrës në Kosovë, sepse sipas tij, janë 100 mijë që presin të vijnë.

Ministri i Diasporës, Ibrahim Makolli thotë se është i hapur të bashkëpunojë me të gjithë të cilët mund të kontribuojnë në shfrytëzimin më të mirë të remitancave. Në këtë aspekt Makollit i pëlqen ideja e Metës.