Objekt për 18 familje shqiptare

Këto familje kanë jetuar për vite të tëra në një strehimore kolektive në lagjen Bair, ndërsa nga sot do të jetojnë nëpër banesa të ndara

Tetëmbëdhjetë familje shqiptare të Mitrovicës së veriut, kanë përfituar nga një projekt i përbashkët i Komunës së Mitrovicës, Ministrisë së Punës dhe Mirëqenies Sociale dhe Mercy Corpsit, i cili u ka mundësuar atyre akomodim në një objekt të përbashkët banimin  në lagjen Shipol të Mitrovicës.

Këto familje kanë jetuar për vite të tëra në një strehimore kolektive në lagjen Bair, ndërsa nga sot do të jetojnë nëpër banesa të ndara.  

Objekti i adaptuar për banim, i cili u përurua të hënën nga kryetari i komunës së Mitrovicës, Avni Kastrati, zëvendësministri i Punës dhe Mirëqenies Sociale, Fatmir Shurdhaj dhe shefi i projekteve të Mercy Corpsit, Li Norgard, më parë ishte shfrytëzuar nga TMK-ja dhe më pas edhe nga Policia e Kosovës.

Ata u shprehën shumë të kënaqur që kanë mundur të ndihmojnë për krijimin e kësaj mundësie për familjet që kanë jetuar në strehimore.

 “Është gëzim për ne të gjithë, meqë duke ju falënderuar ministrisë për Mirëqenie Sociale, por edhe Mercy Corpsit kemi arritur të përmbyllim meremetimin e këtij objekti dhe të shndërrojmë në një objekt ku janë strehuar 18 familje”, tha prefekti i Mitrovicës, Avni Kastrati.

Ndërsa, zëvendësministri i Punës dhe Mirëqenies Sociale, Fatmir Shurdhaj, tha se Qeveria e Republikës së Kosovës do të vazhdoj të ndihmoj familjet që kanë probleme me strehim si dhe procesin e rindërtimit në veri të Mitrovicës.

 “Në bashkëpunim me kryetarin dhe Mercy Corpsin kemi arritur ta adaptojmë këtë objekt për banim. Edhe në të ardhmen Qeveria e Kosovës do të intervenoj për të gjetur strehim”, tha ai.

Edhe Lin Llorgeret nga Mercy Corpsi tha se është veç një projekt prej të shumtave që kanë realizuar me komunën. Është një bashkëpunim i veçantë. Ne do të vazhdojmë edhe në ardhmen”.

Drejtori për Integrime Evropiane dhe Mirëqenie Sociale, Faik Prekazi tha se vlera e përgjithshme e investimit për adaptimin e objektit në Shipol, ku më herët ishte shfrytëzuar nga TMK-ja dhe mandej policia është afër 120 mijë euro.

Sipas tij, prej tyre 70 mijë euro i ka siguruar Mercy Coropsi, 25 mijë Ministria e Punës dhe Mirëqenies Sociale dhe 20 mijë Komuna e Mitrovicës.