Ministri Burkhalter, vizitë pune në Bosnjë

Ministri i jashtëm, Burkhalter në bashkëbisedim me homologun e tij Lagumdzija ka nënvizuar mbështetjen e bashkëpunimit regjional në Ballkanin Perëndimor

Ministri i jashtëm i Zvicrës Didier Burkhalter po qëndron në një vizitë pune në Ballkanin perëndimor. Të hënë ai ka takuar në Sarajevë homologun e tij boshnjak Zlatko Lagumdzija. Në fokus të këtij takimi ka qenë thellimi i marrëdhënieve bilaterale dhe bashkëpunimi regjional.

Aktualisht sipas Ministrisë së Punëve të Jashtme në mes të dy shteteve është duke u zhvilluar një bashkëpunim në arsimimin profesional, në shëndetësi, migracion dhe drejtësi. Ndërsa në aspektin ekonomik Zvicra dhe Bosnja negociojnë një marrëveshje mbi tatimin e dyfishtë. Ndërsa Bosnja është po ashtu duke negociuar me EFTA-n një marrëveshje për tregtinë e lirë.

Burkhalter në bashkëbisedim me homologun e tij ka nënvizuar mbështetjen e bashkëpunimit regjional në Ballkanin Perëndimor. Po ashtu ai ka theksuar rëndësinë  Zvicra i jep misionit paqësor Eufor Althea. Në kuadër të tij janë të angazhuar 20 ekspertë zviceranë.