93 helmeta vendosen te Qeveria, për ata që vdiqën në vend të punës

93 helmeta për rastin e çdo të vdekuri në vendin e punës, janë vendosur  në rrethojat e ndërtesës së Qeverisë. Me moton: “Ndërtesat janë tuajat, jeta është jona”, organizata joqeveritare “Beyond the Wall” ka protestuar pas rasteve të shumta të vdekjeve në vendin e punës.

Protestuesit janë nisur nga sheshi “Zahir Pajazit”, për të vazhduar deri te ndërtesa e Qeverisë me 93 helmeta për rastin e çdo të vdekuri në vendin e punës. Kushtrim Ahmeti, organizator i protestës, ka thënë se secili rast që zbardhet, helmeta largohet nga rrethojat e Qeverisë, përcjell albinfo.ch.

“Këto 93 helmeta do të shtohen në qoftë se ka numër tjetër të vdekjeve në vendin e punës, për secilën vdekje të re, do të shtohet një helmetë me numër të ri, e nëse zbardhet, do të hiqet një helmetë”, ka thënë ai.

Kryetari i Sindikatës së Pavarur të Sektorit Privat, Jusuf Azemi, ka deklaruar se ndonëse kanë ofruar zgjidhje për zvogëlimin e vdekjeve të punëtorëve, qeveria nuk është interesuar për këtë çështje.