Rrëfimi i polices së plagosur

24-vjeçarja kishte tre vite që i ishte bashkuar Policisë së Tiranës, ndërsa më parë kishte përfunduar edhe studimet në Universitetin e Sporteve

Në një rrëfim ekskluziv për emisionin “Open” me Eni Vasilin në “TCH”, policja e plagosur në dorë, Ina Nuka tregon momentin e plagosjes nga një plasëse.

“Ishim me shërbim te Parlamenti për protestën. Situata u tensionua dhe turma nisi të shtynte. Isha në rreshtin e dytë dhe një nga këto plasëset më ra në trup dhe u mundova ta shmang me dorën e djathtë, pasi e kisha në pjesën e qafës”, tregon Nuka, përcjell albinfo.ch.

24-vjeçarja Ina Nuka është efektive e repartit “Shqiponja” në Tiranë.

Në spital, të lënduarit e policisë i vizitoi edhe kryeministri i Shqipërisë, Edi Rama.

“Prerja e gishtave të vajzës është vërtetë një vijë e kuqe që është vendosur sot mes atyre që kanë marrë përsipër t’i kundërvihen ligjit dhe Policisë së Shtetit që është në mbrojtje të ligjit dhe në mbrojtje të interesave publike. Nuk ka shans që ligji të mos zbatohet njësoj për të gjithë. Sa më shumë i bien ndesh ligjit, aq më shumë do të përballen me ligjin”, tha Rama.

24-vjeçarja kishte tre vite që i ishte bashkuar Policisë së Tiranës, ndërsa më parë kishte përfunduar edhe studimet në Universitetin e Sporteve.

Ajo do të transferohet në Turqi për shërim të mëtutjeshëm.

---