SHBA: Arrihet marrëveshja për hapjen e Qeverisë

(AP Photo/Manuel Balce Ceneta)

Presidenti i Shteteve të Bashkuara, Donald Trump, bëri të ditur se është arritur marrëveshja që mundëson hapjen e Qeverisë së Shteteve të Bashkuara.

“Jam shumë krenar të njoftoj se kemi arritur marrëveshje për t’i dhënë fund mbylljes së Qeverisë”, tha presidenti amerikan Trump, në një paraqitje nga Shtëpia e Bardhë, 35 ditë pasi Qeveria u mbyll, duke lënë 800.000 punëtorë federalë pa pagesa, shkruan REL, përcjell albinfo.ch.

Mbyllja e Qeverisë erdhi si pasojë e mosmarrëveshjeve ndërmjet Shtëpisë së Bardhë dhe ligjvënësve demokratë për ndërtimin e murit në kufirin me Meksikën.

Presidenti amerikan kërkon 5.7 milardë dollarë për ndërtimin e murit, mirëpo kjo kundërshtohet nga demokratët që udhëheqin me Dhomën e Përfaqësuesve.

Presidenti amerikan tha se hapja e Qeverisë do të ndodhë për një periudhë trejavore, duke i dhënë kështu kohë një Komiteti dypartiak të ligjvënësve për t’u takuar dhe për të diskutuar nevojat e sigurisë kufitare të vendit.