Fillojnë karnavalet tradicionale në Venecia

Një flotë e anijeve me venecianë të maskuar dhe me kostume, shënoi fillimin e sezonit të karnavaleve në qytetin e famshëm italian, Venecia.  Më shumë se 130 anije me vizitorë u futën në lagjen Cannaregio. 

Atyre u brohorisnin njerëzit, që kishin dalë për të parë paradën. Këto karnavale për herë të parë janë organizuar në shekullin XI, për t’i paraprirë Pashkëve. 

Gjatë dy javëve të karnavalit, qyteti mbushet me mijëra turistë nga e gjithë Italia dhe bota. Turisti Alexis Marathovouniotis, i cili erdhi nga Qipro, tha se karnavali i Venecias është përvojë që të gjithë duhet të kenë të paktën një herë në jetë. Alessandra Turazza nga Verona tha se ngjarja ka vlerë historike dhe është e pamundur të kopjohet nga ndonjë qytet tjetër, përcjell albinfo.ch.

Në shekullin e 18-të maskat u përdorën nga të pasurit për të mbetur anonim derisa votonin për çështjet e Këshillit. Disa maska u përdorën për t’u mundësuar njerëzve të shmangin erën e keqe të kanaleve ose nëse murtaja godet qytetin.