“27 prilli” në Maqedoni, dyshime edhe për Nikolla Gruevskin

Pas hetimeve paraprake, Prokuroria për krim të organizuar dhe korrupsion ka hapur procedurë hetimore për pesë persona, gjegjësisht, ish-kreun e Kuvendit, Trajko Veljanovski, ish-ministrat Spiro Ristovski dhe Mile Janakieski, të cilët dyshohen se kanë organizuar ngjarjet e dhunshme në Kuvend më 27 prill të vitit 2017. Dy personat e tjerë sipas informacioneve jozyrtare janë ish-kryeministri Nikolla Gruevski, ish-agjenti i DSK-së, Nikolla Boshkovski.

Në orën 18:00 në Gjykatën Penale u morën në pyetje Veljanovski, Ristovski dhe Janakieski. Gruevski mbetet në arrati në Budabest, kurse Boshkovski në Greqi, shkruan AlsatM, përcjell albinfo.ch.

Veljanovski menjëherë pas përfundimit të bisedës është liruar, meqë gëzon imunitetin e deputetit. As kundër Janakieskit nuk mund të shqiptohet masa e paraburgimit, meqë kundër tij tani më rëndon masa e arrestit shtëpiak nga rastet të tjera gjyqësore. Ristovski vazhdon ende të merret në pyetje në Gjykatën Penale dhe me gjasë do t’i shqiptohet masa e paraburgimit dhe i njëjti do të dërgohet në burgun e Shutkës.