Vdes në moshën 67-vjeçare publicisti Arben Xoxa

Mësohet se Xoxa ndërroi jetë në krah të gruas së tij, Valbonës dhe vajzës së tij, Ajola Xoxa, bashkëshortja e kryebashkiakut, Erion Veliaj. Homazhet do të zhvillohen të hënën, në orë 10:00 pranë Akademise së Shkencave te Biblioteka.

Arben Xoxa lindi në Tiranë më 1 maj 1952, djali i Dhurata dhe Jakov Xoxës. Studioi gjuhë-letërsi dhe u specializua si kritik arti, gjithmonë me rezultate të shkëlqyera. Më pas punoi për shumë vite si pedagog në Universitetin e Tiranës, drejtues në Ministrinë e Arsimit, Akademinë e Shkencave, RTSH dhe më pas prej vitit 1996 si Drejtor i Shtëpisë Botuese Enciklopedike, duke i qëndruar pranë dashurisë së tij më të madhe profesionale, librave, shkruan newsbomb, përcjell albinfo.ch.

Xoxa që në rini e deri vonë ishte i angazhuar në shtypin vendas dhe të huaj, dhe është autor i qindra shkrime dhe studime. Arben Xoxa është një prej personaliteteve të spikatura të mendimit kritik shqiptar.

Gjithmonë patriot, gjatë viteve të fundit u tërhoq nga shtypi dhe iu përkushtua botimit të veprave ndriçuese mbi historinë dhe çështjen shqiptare.