Tregtia botërore e mallrave të falsifikuara, 460 miliardë euro në vit

Tregtimi i mallrave të falsifikuara arrin në 460 miliardë euro në vit, sipas një vlerësimi i ri të Zyrës së Bashkimit Europian për të Drejtën e Autorit (EUIPO) dhe të Organizatës për Bashkëpunim dhe Zhvillim Ekonomik (OCDE).

”Shitja e mallrave dhe produkteve të falsifikuara arrin kështu 3,3% të tregtisë botërore, kundrejt 2,5% gjatë vlerësimit të mëparshëm më 2016”, bëjnë me dije dy institucionet në një komunikatë, duke cituar një rritje të konsiderueshme.

Vetëm në Bashkimin Europian mallrat e falsifikuara dhe mallrat kontrabandë arrijnë deri në 121 miliardë euro, ose 6,8% të numrit të përgjithshëm të importeve të BE-së, sipas raportit EUIPO-OCDE të 2019-ës, shkruan atsh, përcjell albinfo.ch.

Kjo shifër shënon gjithashtu një rritje të madhe në raport me 5% të vlerësuara në raportin e 2016-ës.

‘’Mallrat e falsifikuara dhe pirateria janë një kërcënim i madh për shpikjet dhe rritjen ekonomike si në nivelin e BE-së, ashtu dhe atë botëror’’, paralajmëroi drejtoresha ekzekutive e EUIPO-s, Christian Archambeau, cituar në komunikatë.