PS-ja përdori burime shtetërore në kundërshtim me ligjin

Në Kongresin e Partisë Socialiste, të mbajtur të shtunën, ku edhe u bënë publike disa nga kandidaturat për zgjedhjet lokale të 30 qershorit, u përdoren edhe burime shtetërore në funksion të fushatës elektorale.

Instituti i Studimeve Politike me mbështetjen e Programit të USAID-it në Shqipëri është duke kryer monitorimin e përdorimit të mundshëm të burimeve shtetërore në funksion të fushatës elektorale për zgjedhjet lokale 2019.

Fokusi i ISP-së ka qenë qeveria qendrore, si dhe Bashkitë Durrës, Vlorë dhe Kamëz. Nga monitorimi i deritanishëm janë raportuar raste të shumta të presionit shtetëror dhe detyrimit të punonjësve të administratës publike për të marrë pjesë në aktivitete partiake dhe elektorale.

Rasti më i fundit ishte manifestimi politik dhe elektoral i PS-së në Tiranë,  ku sipas ISP-së, pati shumë punonjës të administratës dhe enteve publike që u detyruan të marrin pjesë në aktivitetin kryesor.

“Janë konstatuar raste të shumta kur nëpunës publikë me status civil jo vetëm marrin pjesë në aktivitete elektorale, por edhe drejtojnë mbledhje të strukturave politike, kandidojnë për poste në parti politike apo mbajnë fjalime publike në aktivitete paraelektorale të partive, praktikë që dukshëm shkel ligjin dhe mbetet një shqetësim i madh për nivelin e lartë të politizimit të administratës publike në nivelet e qeverisjes qendrore dhe sidomos asaj lokale”, theksohet në raport.

Secili prej këtyre, sipas ISP-së, përbën shkelje të dispozitave të Kodit Zgjedhor dhe, në raste të caktuara, edhe indicie për hetim nga ana e Prokurorisë.