Zgjedhjet në Turqi me shumë tensione

Sipas rezultateve të para jozyrtare të zgjedhjeve lokale në Turqi, partia AKP e presidentit Recep Taip Erdogan ka fituar më së shumti vota në qytetin e madh Stamboll.

Dallimi mes partisë në pushtet dhe opozitës në Stamboll ishte sipas rezultateve të para diku rreth 4-5%. Por përfaqësuesit e opozitës janë në epërsi në disa qytete të tjera.

Një garë kokë më kokë po zhvillohet edhe në Ankara, kryeqytetin e Turqisë, raporton “DW”.

Kandidati i AKP në Bosfor ishte ish-kryeministri Binali Yildirim, ndërsa i opozitës kryetari i bashkisë së qarkut Ekrem Imamoglu. AKP ka kandiduar së bashku, sikur edhe në zgjedhjet parlamentare dhe presidenciale të qershorit të 2018 me partinë ultra djathtiste MHP. Ndërsa partia e majtë CHP ishte në koalicion me të djathtën IYI, përcjell albinfo.ch.

Ka dhe të vrarë

Zgjedhjet kanë kaluar me probleme të mëdha. Agjencia e lajmeve DHA njofton edhe për një incident të rëndë në një vendvotim në Pötürge. Një person ka shtënë me armë zjarri dhe ka vrarë dy të tjerë. Vrasësi më pas është arrestuar. Temel Karamollaoglu, kryetar i partisë së vogël Saadet, thotë se të vrarët kanë qenë vëzhgues të partisë së tij në vendvotim. Ata kanë protestuar për shkak të parregullësive në këtë vendvotim dhe i pasojë janë vrarë.

Rreth 57 milionë shtetas të Turqisë kanë votuar për kryetarët e bashkive dhe anëtarët e kuvendeve komunale. Zgjedhjet janë mbajtur në të gjitha 81 provincat njëkohësisht. Zyrtarisht thuhet se zgjedhjet i kanë siguruar rreth 550.000 forca të sigurisë.

Erdogani në qendër të fushatës

Zgjedhjet lokale janë një test shumë i rëndësishëm për gjendjen në Turqi dhe mbështetjen aktuale të partisë AKP të presidentit Erdogan. Presidenti është angazhuar vet gjatë fushatës pothuajse në të gjithë vendin. Ndërsa partitë opozitare e kanë quajtur Erdoganin armik të vendit. Erdogani i ka quajtur zgjedhjet të një “rëndësie kombëtare” me shpjegimin se Turqia kërcënohet nga armiqtë e jashtëm.

HDP kurde pohon se është dëmtuar

Partia prokurde HDP ka kritikuar qeverinë për dëmtimin e saj. Gjatë fushatës janë arrestuar 713 përfaqësues dhe anëtarë të HDP. 107 prej tyre ende janë nën masa arresti, kumtoi partia. Opozita pohon se partia në pushtet i ka shfrytëzuar të gjitha kapacitetet shtetërore dhe mediat për fushatë. Vendi është polarizuar ndërsa opozitarët pohojnë se ata janë kriminalizuar dhe quajtur “terroristë”.