Procedura e azilit, jo më e gjatë se 140 ditë

Azilkërkuesit nuk do të kenë të drejtë të qëndrojnë më gjatë se 140 ditë këtu, siç e parashikon strategjia e re e azilit në Zvicër

Baraka të ndërtuara para 50 vitesh për gastarbajterët, diku në mes të autostradës dhe hekurudhës, në Altsttten të Cyrihut. Ky është vendi ku, nga 6 janari 2014 do të vendosen maksimalisht deri në 300 azilkërkues. Ata nuk do të kenë të drejtë të qëndrojnë më gjatë se 140 ditë këtu, siç e parashikon strategjia e re e azilit në Zvicër. E gjithë procedura nuk guxon të zgjasë më shumë. Por kjo nuk do të thotë që azilkërkuesit nuk do të trajtohen në mënyrë korrekte.

Ata, jo larg arealit të barakave ku do të vendosen, do të kenë qendrën e zhvillimit të procedurës, ku për ta do të punojnë rreth 30 punonjës të Zyrës Federale për Migracion (BFM). Veç tjerash, azilkërkuesit e strehuar në këtë qendër federale të tipit të ri, do të kenë në dispozicion shërbimin juridik e këshillues falas, nga Flüchtlingshilfe.

“Por, rezultatet e para do t`i kemi pasi të ketë mbaruar faza e parë, testuese” ka thënë për një emision të srf, një zyrtar i BFM-së.

Regjimi i banimit është i ashpër. Azilkërkuesit, nga ora 20 deri në orden 7 të mëngjesit nuk kanë të drejtë të dalin nga qendra. Kjo domethënë që ata nuk guxojnë të dalin “për të pirë ndonjë birrë”, thotë një zyrtar nga Organizata e Azilit në Cyrih. Por, sqaron ai, megjithatë “ata që vijnë për shembull në orën 24 nga qyteti, do të lejohen të hyjnë brenda.

Programi testues në Cyrih do të zgjasë 20 muaj. Pas kësaj faze, ekspertët e jashtëm do të vlerësojnë nëse procedura e shkurtuar sipas konceptit të ri ka funksionuar mirë ose jo.