Studentët zviceranë dhe maqedonas, bashkë për zhvillimin e bizneseve

Embassy of Switzerland in North Macedonia (fb)

Në Shkup ka filluar java “Zhvillimi i sipërmarrjes së bashku”, me ç’rast 100 studentë nga Zvicra dhe Maqedonia Veriore janë bërë bashkë për të shkëmbyer njohuritë dhe përvojat e tyre në zhvillimin e bizneseve, shkruan albinfo.ch.

Në hapjen e këtij aktiviteti ishte i pranishëm edhe ambasadori zviceran, Sybille Suter, i cili ndër të tjera tha se sipërmarrësit e rinj kanë shumë për të mësuar nga shteti maqedonas.

“Gjatë punës sime në Maqedoninë Veriore, pata rastin të takoja shumë sipërmarrës të suksesshëm. Shpesh kam dëgjuar se tregu i vogël dhe mjedisi sfidues kanë krijuar pengesa për sipërmarrësit, po ashtu kam parë se si këto sfida kanë kontribuar në krijimin e sipërmarrësve të përkushtuar e me fleksibilitet të madh. Këta faktorë janë shumë të rëndësishëm për sukses, dhe sipërmarrësit e vendeve të tjera kanë shumë për të mësuar nga vendet si Maqedonia Veriore”, citohet ambasadori Suter në një njoftim të Ambasadës Zvicerane në Maqedoni.