SVP/UDC kërkon kufizime në bashkimin familjar të të huajve

Kërkohet njohja e gjuhës së vendit për personin që vjen nga jashtë për të bërë bashkimin familjar. Regjistrimi në një kurs të gjuhës nuk është i mjaftueshëm

Realizimi i qëllimit për votimin e iniciativës “Kundër Migracionit Masiv” i ka hapur SVP/UDC-së mundësi të reja për veprime kërkesa konkrete restriktive në fushën e migracionit. Kufizimi i të drejtës së të huajve për bashkim familjar në Zvicër dhe thjeshtësimi i mundësisë për anulimin e lejes së qëndrimit për të huajt janë dy nga këto. Në këtë drejtim SVP në mbledhjen e komisionit për politika shtetërore në Parlamentin Nacional që mbahet të premten do të paraqesë rreth 35 kërkesa.

Këto kërkesa ajo i shtron në kuadrin e rishikimit të Ligjit për të Huajt që është në realizim e sipër. Sipas kërkesave në fjalë, të huajt me qëndrim të shkurtër dhe ata me pranim të përkohshëm (Viza F) nuk do të kenë fare të drejtë të bashkimit familjar. 

Kërkesa e radhës është kushti i njohjes së gjuhës së vendit për personin që vjen nga jashtë për të bërë bashkimin familjar. Për këtë kusht, regjistrimi në një kurs të gjuhës nuk do të jetë i mjaftueshëm, kërkon SVP, duke u vënë kështu kundër propozimit të Këshillit Federal, shkruan aargauerueitung.ch.

Anulimi i lejes së qëndrimit në Zvicër të të huajit sipas kërkesave të bëra nga SVP do të bëhet më lehtë. Ndërsa kërkesa e radhës që do të paraqitet në komisionin e përmendur është që të huajt me qëndrim të përkohshëm mund të marrin një leje qëndrimi të rregullt ose vizë B vetëm kur i plotësojnë kriteret për integrim. Dhe, këto kritere sipas përkufizimit të SVP-së plotësohen kur i huaji komunikon dhe kuptohet mirë në njërën nga gjuhët e vendit, ka një vend pune ose ndjek kualifikimin profesional dhe nuk merr ndihma sociale.   

Ky përkufizim shkon dukshëm më larg se ai që përmban ligji aktual. Sipas tij, i integruar konsiderohet ai i huaj që i përmbahet rregullave për sigurinë publike, respekton vlerat e Kushtetutës federale, dëshiron të marrë  pjesë në jetën ekonomike dhe e zotëron njërën nga gjuhët e vendit.