Zvicra vendos pro vizave me kusht për Ballkanin

Secili shtet i Shenegenit, nëse ballafaqohet me pasoja serioze nga numri i madh i azilkërkuesve mund të kërkojë rivendosjen e detyrimit tës vizës për shtetet e treta

Siç ishte paralajmëruar, Këshilli Federal i Zvicrës ka miratuar klauzolën mbrojtëse për vizat e Shengenit. Kjo ka të bëjë me shtetasit e vendeve të treta, të cilëve mund t`u pezullohet përkohësisht lirimi nga detyrimi për viza, në rastet kur kjo gjendje do të ketë pasoja të rënda për njërin nga shtetet nënshkruese të Shengenit. 

Siç ishte informuar, ministrat e brendshëm të vendeve të BE-së e kishin miratuar që në dhjetor të vitit të kaluar klauzolën mbrojtëse. Kjo kishte ardhur si reagim ndaj numrit të rritur të kërkesave të azilit nga vendet e Ballkanit Perëndimor (të liruara nga vizat) në disa nga vendet e zonës.

Në një përgjigje për albinfo.ch zëvendësshefi për informim dhe komunikim në Departamentin Federal të Drejtësisë dhe Policisë, Martin Reichlin rreth një muaj më parë pati konfirmuar se “bëhet fjalë për një rregullore të re që rregullon zhvillimin e mëtejshëm të ligjësisë lidhur me zonën Schengen. Ndonëse kjo masë e marrë nga BE ende nuk është notifikuar zyrtarisht nga Zvicra, kjo pritet të ndodhë së shpejti dhe atëherë Zvicra do të adoptojë një përshtatje të rregullimit të ri”.

Bazuar në rregullimin e ri, secili shtet i Shenegenit, përfshirë këtu edhe Zvicrën, në rast se ballafaqohet me pasoja serioze, fjala vjen, nga numri i madh  i azilkërkuesve mund të kërkojë futjen e sërishme të detyrimit për kërkim vize për shtetet e treta.

Vendimi për futjen e serishme të detyrimit për viza do të merret nga Komisioni Evropian, i cili në një rast të tillë do të marrë parasysh numrin e shteteve të prekura dhe ndikimin që do të ketë në zonën e gjithëmbarshme të Shengenit një paraqitje e tillë. Komisioni i BE-së do të propozojë si “masën më të fundit” rivendosjen e regjimit të vizave për një shtet konkret të tretë, shkruan sda/ats.

Zvicra ka marrë pjesë aktive në përpunimin e klauzolës mbrojtëse dhe e ka mbështetur atë. Shteti zviceran e mbështet sistemin e lirimit nga regjimi i vizave por i konsideron si të domosdoshme masat për luftimin e abuzimeve te mundshme, shkruan Zyra Federale për Migracion (BFM) në një komunikatë. Por, mekanizmi i ri, sipas BFM-së, do të përdoret në mënyrë të matur.

Ndërkaq, BFM njofton pp ashtu se, në rastet kur futet përkohësisht detyrimi i vizës për një shtet të tret, vizat mund të kërkohen edhe nga qytetarët e zonës së Shengenit. (sda/ats-albinfo.ch)