Francë: Mbyllen dhjetëra shkolla për shkak të temperaturave të larta

Franca ka filluar të mbyllë dhjetëra shkolla për shkak të një vale të nxehtë që ka kapluar vendin. Ndërkaq, të enjten temperaturat pritet të rriten në mbi 40 gradë Celsius në disa rajone.

Rreth 50 shkolla në rajonin e Essonne në jug të Parisit po mbyllen, për shkak se nuk kanë ajër të kondicionuar të mjaftueshëm, shkruan BBC, përcjell në shqip albinfo.ch.

Transmetuesi franzec BFMTV njoftoi se gjatë së enjtes do të mbyllen edhe disa shkolla në regjionet Val-de-Marne dhe Seine-et-Marne afër Parisit.

Në disa pjesë të Spanjës verilindore i nxehti pritet të arrijë deri në 45 gradë Celsius të premten. Gjermania dhe Italia ende kanë temperaturat nën 40 gradë.

Ajri jashtëzakonisht i nxehtë raportohet se ka ardhur nga Sahara.

Në Zvicër po ashtu po bën shumë nxehtë, por autoritetet insistojnë që shkollat të mbeten të hapura, sepse prindërit që janë në punë nuk mund të kujdesen për fëmijët e tyre gjatë ditës.

Ndërkaq, zyrtarët francezë kanë vendosur që në Paris dhe në Lyon, nga e mërkura, të lejohen në rrugë vetëm automjetet që krijojnë më pak ndotje.

Shoferëve të Parisit po ashtu po iu ofrohet parking falas, për t’i inkurajuar që të përdorin transportin publik në vend të veturave të tyre.

Gjatë vitit 2003 Franca ishte kapluar nga një valë e nxehtësisë, për të cilën u raportua se shkaktoi mijëra vdekje, përcjell albinfo.ch.