Maqedonia josh investitorët kosovarë

Gjatë tre muajve të parë të këtij vitit jashtë Kosovës janë investuar mbi pesë milionë euro

Sipas Bankës Qendrore të Kosovës investimet kanë shkuar kryesisht në Maqedoni dhe Shqipëri, pastaj në Gjermani, Zvicër dhe Holandë. Bëhet fjalë për investime në pasuri të patundshme, por edhe në turizëm dhe ndërtimtari.

 Biznismenët kosovarë thonë se vendet fqinje kanë politika fiskale më të favorshme se në Kosovë.

Shumë biznesmenë kosovarë kapitalin e tyre e kanë investuar në vendet fqinje dhe më gjerë, për shkak të fitimeve të larta, të tjerët për shkak të kushteve të pafavorshme të biznesit në Kosovë. Për këtë arsye ata zgjodhën rajonin, veçanërisht Maqedoninë dhe Shqipërinë, ku ka kushte të favorshme për të investuar, transmetojnë mediat në Prishtinë.

Sipas Besnik Kades nga  Banka Qendrore, investimet e Kosovës jashtë vendit vitin e kaluar kapin shumën  17.9 milionë euro, ndërsa në tre muajt e parë të këtij viti 5.2 milionë eruo. Për tremujorin e dytë nuk janë publikuar ende statitikata për investimet jashtë vendit, thonë në Bankën Qendrore të Kosovës.