Deri në 300 të vdekur në vit nga gripi i fituar në spitale!

Shkaktari kryesor për infektimin me grip në spitale është refuzimi në rritje i një pjese të personelit spitalor për të marrë vaksinën që parandalon gripin

Në Zvicër, vetëm nga infektimi me grip gjatë qëndrimit në spital, vdesin nga 100 deri 300 persona në vit. Kështu së paku ka vlerësuar në një intervistë për gazetën “Sonntagszeitung” infektologu nga Bazeli, Andreas Widmer, njëherësh kryetar i organizatës që merret me higjenën në spitale, Swissnoso.

Widmer, i cili është edhe profesor universitar i mjekësisë, konstatimin e tij e mbështet mbi një vlerësim të bërë në Spitalin Universitar të Gjenevës. Në këtë spital prej tri vitesh sistemohen të dhënat mbi rastet e gripit që vijnë si pasojë e infektimit në spital.

Shkaktari kryesor për infektimin me grip në spitale është refuzimi në rritje i një pjese të personelit spitalor për të marrë vaksinën që parandalon gripin.

Në Zvicrën gjermane, shkalla e personelit që vaksinohet vullnetarisht mund të arrihet maksimalisht deri në 35 për qind, ndërsa për mbrojtje efektive kundër gripit në spitale do të ishte e nevojshme që kjo shkallë  të jetë 50%, ka thënë dr. Widmer.

Ai është i bindur se rastet e vdekjes si pasojë e infektimit me grip në spital mund të evitohen në rast se personeli i spitalit i nënshtrohet vaksinimit më masiv. Kështu, Widmer konsideron se punëtorët mjekësorë që nuk duan të vaksinohen, do të duhej të detyroheshin nga shteti që të bartin maska gjatë sezonit të gripit.