Shkupi, i shqetësuar pas dështimit në Bruksel

Në rrjedhë janë konsultime politike në disa nivele, po shqyrtohen dhe analizohen të gjitha opsionet, thonë nga Qeveria lidhur me hapat e ardhshëm që do të ndërmerren pas takimit të liderëve të BE-së në Bruksel, në të cilin vendoset për negociatat inkuadruese me Maqedoninë e Veriut.

Analiza dhe konsultime po bëhen edhe në partitë politike, ndërkaq tashmë ka paralajmërim edhe për takim të mundshëm të liderëve te presidenti i vendit, Stevo Pendarovski. Nga Kabineti i presidentit thonë se me informatë për këtë çështje do të dalin pas përfundimit të Samitit të BE-së në Bruksel.

Nga BDI konfirmuan se kryetari i partisë, Ali Ahmeti, ka marrë ftesë nga shefi i shtetit për takim të liderëve të partive politike nga blloku politik maqedonas dhe ai shqiptar të dielën, në vilën “Vodno”. Tani për tani nuk ka konfirmim për atë nëse ftesën e kanë marrë edhe liderët e LSDM-së, VMRO – DPMNE dhe partive të tjera politike.