Familjarët e vëllezërve Abazi: Nuk mund të besojmë

Ata janë të shokuar nga e gjithë kjo ngjarje e rëndë

Ishin nisur pardje në mëngjes për në Durrës. Aty do të shkonin për disa ditë, me qëllimin që t’i kryenin disa punë. Por, dy vëllezërit nga fshati Livoç i komunës së Gjilanit patën fatin e keq dhe mbetën nën gërmadhat e hotelit në Durrës, ku po qëndronin, pas tërmetit të tmerrshëm, i cili e goditi mbrëmë Shqipërinë, duke e gjetur kështu vdekjen. Familja Abazi për vite u përcoll nga histori tragjike. Asaj vite më parë iu shua edhe një djalë. Express ju sjell rrëfimin e dhimbshëm nga Livoçi i Gjilanit.

Mbijetesën po e siguronin nga punët që kohë pas kohe po i kryenin si mekanikë në Shqipëri. Me këto punë, dy vëllezërit tashmë të ndjerë Shemsedin e Isa Abazi, njëri 32 e tjetri 29-vjeçar po merreshin një kohë të gjatë.

Por e hëna doli të jetë fatale për këta dy vëllezër. Ata njëjtë sikur mijëra shqiptarë të tjerë u goditën mbrëmë rreth orës 04:00 pas mesnate nga një tërmet me magnitudë prej 6.4 shkallë të Rihterit, duke mbetur kështu nën gërmadhat e hotelit, ku po qëndronin, raporton Gazeta Express.

Për fatin e tyre nuk u ditë asgjë për më shumë se 15 orë. I pari pa shenja jete u gjet Isai, 29-vjeçar. Më pas, i vdekur u gjet edhe vëllai i tij, Shemsedini, 32-vjeçar.

Gazeta Express ka qëndruar në shtëpinë e këtyre dy vëllezërve në fshatin Livoç të Gjilanit. Ata janë të shokuar nga e gjithë kjo ngjarje e rëndë, përcjell albinfo.ch.

“Nuk po duam të besojmë se ata janë djemtë tanë. Kjo nuk është e mundur. Thjesht, nuk mund që të jenë ata”, flasin nën lot familjarët e dy vëllezërve tashmë të ndjerë.

Ata tregojnë se Shemsedini e Isai kishin shkuar për punë në Durrës. Këta të dy kanë lënë pas edhe fëmijë, njëri katër, tjetri dy.

Familjet e të ndjerëve jetonin në kushte të rënda sociale.

Por kjo familje para shtatë vjetëve është përballur me një tragjedi tjetër. Djali i tyre ishte therë me thikë në një pishinë, ku nga plagët kishte ndërruar jetë. Tash në familjen Abazi ka mbetur vetëm një djalë, i cili do të përkujdeset për të gjithë anëtarët e tjerë.

 

---