Gjiganti zviceran, “Roche”, 61.5 miliardë shitje, 14.1 miliardë fitim

Fitimi është rritur për 30 për qind, duke prekur shifrën e 14.1 miliardë frangave

Kompania e madhe farmaceutike e Zvicrës, Roche, me seli në Bazel, ka vazhduar të shënojë rritje edhe në vitin financiar 2019, shkruan srf.ch. Shitjet e saj janë rritur për tetë për qind, duke arritur në 61.5 miliardë franga zvicerane, transmeton albinfo.ch. Fitimi është rritur për 30 për qind, duke prekur shifrën e 14.1 miliardë frangave.

Sipas njoftimit të bërë nga Roche, rritje ka shënuar para së gjithash shitja e disa produkteve më të reja si medikamenti kundër sklerozës së shumëfishtë (Multiples Sclerose) Ocrevus, agjenti imunoterapeutik Tecentriq dhe gjithashtu edhe medikamenti Hemlibra që përdoret për trajtimin e hemofilisë, përcjell albinfo.ch. Këto të gjitha kanë arritur statusin e “bestsellerëve” në vitin 2019, duke realizuar në disa raste edhe shitje prej më shumë se një miliard frangash.

Me shifrat e prezantuara, Roche ka përmbushur afërsisht pritjet mesatare të analistëve.

Roche është, krahas kompanisë Novartis, njëri nga dy gjigantët e industrisë farmaceutike të Zvicrës, shkruan albinfo.ch. Këto dy koncerne bëjnë pjesë po ashtu ndër më të mëdhatë dhe më të vlerësuarat edhe në ranglistat botërore.

---