Zvicra, ende pa masa kundër koronavirusit, pas shpërthimit të tij në Itali

Sipas autoriteteve zvicerane, përkundër situatës së tensionuar në Itali, nuk ka nevojë të menjëhershme për të përshtatur masat edhe në Zvicër, thekson Koch nga BAG

Pas shtimit të rasteve të infektimeve me koronavirus në Itali, autoritetet shëndetësore zvicerane po monitorojnë gjithashtu nga afër zhvillimet në vendin fqinj.

Daniel Koch, Shefi i  sektorit për sëmundjet e transmetueshme në Zyrën Federale të Shëndetit Publik (BAG) shpjegon lidhur me këtë se: “autoritetet atje po përpiqen të kontrollojnë bartjen e virusit dhe kështu të kursejnë kohë”, shkruan sda.ch.

Koch supozon se autoritetet italiane gjithashtu po bëjnë përpjekje për të zbuluar se si përhapet virusi, transmeton albinfo.ch. Orët e ardhshme me siguri do të jenë vendimtare për të parë nëse virusi po përhapet gjerësisht në Itali. “Është e vështirë të vlerësohet për momentin”, ka thënë Koch.

Por, sipas autoriteteve zvicerane, përkundër situatës së tensionuar në Itali, nuk ka nevojë të menjëhershme për të përshtatur masat edhe në Zvicër, thekson Koch.

Ndërkohë BAG ka bërë të ditur dje  gjendjen në lidhje me dymbëdhjetë zviceranët që ishin në karantinë në MS Westerdam në Kamboxhia dhe më vonë në Zvicër: “Rastet e dyshuara për infektim me koronavirus nuk janë konfirmuar, karantina është hequr”, kanë konfirmuar në BAG.

Në Lombardi,  regjionin italian në kufi me Zvicrën, deri më tash janë regjistruar 89 të infektuar me koronavirus, dy prej të cilëve kanë vdekur, përcjell albinfo.ch. Autoritetet e atjeshme kanë marrë masa të shumta për të ndërperë përhapjen e virusit, përfshirë këtu edhe ndalimin e ndeshjeve futbollistike, karnevaleve dhe manifestimeve të ndryshme publike, shkuarjes në kisha etj.

---