Gjermania ndan 750 milionë euro për gjetjen e vaksinës kundër COVID 19

Qeveria gjermane do të shpenzojë 750 milionë euro, me qëllim për të përshpejtuar procesin e prodhimit dhe zhvillimit të vaksinës.

Ministrja e Arsimit dhe Shkencës, Anja Karliczek deklaroi se rreth 500 milionë euro nga buxheti do të përdoren për studime shkencore dhe testimin e vaksinës, ndërsa 250 milionë euro do të dedikohen për zgjerimin e kapacitetit prodhues në Gjermani.

Ndërkohë, një nga qëllimet e programit të financimit është të lejojë provat klinike të punojnë me një numër më të madh pjesëmarrësish.

“Sapo të zbulohet dhe miratohet një vaksinë, prodhimi duhet të jetë në gjendje të fillojë shpejt dhe në një shkallë të gjerë si në Gjermani ashtu edhe në mbarë botën”, shtoi Karliczek.

---