Kosovë: Mbi 600 raste aktive me koronavirus

Foto nga Zyra e Kryeministrit Kurti në Facebook

Ditët e fundit në Kosovë është rritur dukshëm numri i rasteve të reja me Covid-19.

Instituti Kombëtar i Shëndetësisë Publike njofton se nga data 8 shkurt deri më 15 qershor në Laboratorin e Mikrobiologjisë Molekulare me metodën RT-PCR janë testuar gjithsej 18 mijë e 915 persona të dyshimtë në virusin SARS-CoV-2.

Nga numri i përgjithshëm pozitivë kanë rezultuar gjithsej 1 mijë e 615 raste, prej të cilëve 33 raste të vdekjes, të cilët kanë pasur sëmundje të tjera shoqëruese.

Ndërkaq, numri i të shëruarve deri më sot është gjithsej 963 raste, që do të thotë se raste aktive në vendin tonë janë 619 raste.

Mbrëmë është shënuar numri më i lartë i rasteve të reja në një ditë, ku janë regjistruar 129 raste dhe 10 të shëruar.

IKSHPK u drejtohet qytetarëve që të respektojnë të gjitha rekomandimet, ndryshe vendi rrezikon të kthehet në pikën zero.

Instituti Kombëtar kujton se lehtësimi i lëvizjes nuk nënkupton mosrespektimin e rekomandimeve të Institutit Kombëtar dhe Ministrisë së Shëndetësisë me mbajtjen e distancimit fizik dhe mbajtjen e maskave në vendet publike, përcjell Albinfo.ch.