Rekord, 807 pyetje parlamentare i janë bërë Parlamentit të Zvicrës

(KEYSTONE/Lukas Lehmann)

Parlamenti zviceran po përballet me një rekord, 807 pyetje parlamentare në seancat verore. Ligjvënësit jo vetëm që mund të mbajnë fjalime dhe të votojnë për ligjet, por ata gjithashtu mund të bëjnë pyetje, ose të kërkojnë raporte, për të cilat autoritetet duhet të përgjigjen, përcjell albinfo.ch. Deputetët shfrytëzuan rastin për të bërë pyetje masivisht në seancën e jashtëzakonshme në maj dhe seancën verore.  “Numri i pyetjeve parlamentare po rritet çdo vit. Qysh në vitin 2004, ne patëm mesatarisht 187 pyetje në seancë”, shpjegoi Urs Bruderer për ‘Blick’.

Numri i madh i pyetjeve parlamentare tashmë ka qenë objekt i një seance parlamentare, pasi shtjellimi i tyre sjell me vete shumë punë për nëpunësit civilë.

Mesatarisht, përgjigjja për një pyetje parlamentare kushton 6,120 franga zvicerane, u vlerësua 13 vjet më parë, si përgjigje e një pyetjeje parlamentare.

Duke pasur parasysh këto shifra, numri rekord aktual i çështjeve do t’i kushtojë shtetit disa milionë franga.