Eksperti spanjoll: Covid-19 ka pësuar mutacion

(KEYSTONE/Jean-Christophe Bott)

Pandemia e koronavirusit është ende aktive në gjithë botën.

Bota javët e fundit është përballur me një rritje të rasteve. Më shumë se 15.5 milionë të infektuar dhe 652,608  viktima, sipas të dhënave të fundit nga Universiteti John Hopkins.

Madje, disa vende janë duke u përballur me shpërthime të ndërlikuara.

Sipas ekspertit spanjoll, Javier Cabo, doktor i kirurgjisë kardiovaskulare, koronavirusi ka ndryshuar dhe tani aftësia e tij infektuese është shumëfishuar.

Cabo në një intervistë për “El Progreso de Lugo” është shprehur se që nga fundi i shkurtit virusi ka pësuar mutacion, përcjell albinfo.ch.

“70% i gjenomit të virusit ka ndryshuar dhe aktualisht fuqia e tij infektuese është bërë 10 herë më e madhe”, tha eksperti.

Ai theksoi se duhet të merren masa urgjente nga autoritetet për parandalimin e përhapjes së Covid-19. Sipas Cabo, problemi i vërtetë do të jetë në vjeshtë: “Do të kemi problem të madh, sepse vetëm me gripin mbushen spitalet, imagjinoni me koronavirusin”.

Mjeku spanjoll beson se vetëm vaksina ose një ilaç efikas do t’i japë fund pandemisë.