Personat që vijnë nga këto vende nuk mund të hyjnë në Kosovë pa test negativ për COVID-19

Keystone EPA/VALDRIN XHEMAJ

Shtetet si Italia, Kroacia, Polonia dhe Lihtenshtajni, i bashkohen listës së vendeve, shtetasit e të cilave nuk mund të hyjnë në Kosovë pa e poseduar një test PCR-Negativ, shkruajnë mediat vendore, përcjell albinfo.ch.

Deri më tani, pjesë e kësaj liste janë 20 shtete nga Bashkimi Evropian, të cilat kanë rrezik të lartë të infektimit me koronavirus.

Ministria e Shëndetësisë ka deklaruar se Kosova vepron në bazë të listës së publikuar në web-faqen e Qendrës Evropiane për Parandalimin dhe Kontrollin e Sëmundjeve (ECDC), listë kjo që përditësohet vazhdimisht.

“Lista është e publikuar në web-faqen e ECDC dhe në bazë të saj veprohet edhe në Kosovë. Me rrezik të lartë konsiderohen vendet që kanë mbi 120 raste të infektimeve në 100.000 banorë”, kanë deklaruar nga Ministria.

Duke u bazuar në këtë listë, shtetet të cilat i konsideron Kosova me rrezik të lartë të infektimit, janë: Spanja, Franca, Britania e Madhe, Italia, Holanda, Belgjika, Rumania, Polonia, Çekia, Portugalia, Austria, Irlanda, Hungaria, Sllovakia, Kroacia, Sllovenia, Luksemburgu, Malta, Islanda dhe Lihtenshtajni.

Ndërkaq, të gjitha këto shtete kanë mbi 120 raste të infektimeve në 100 mijë banorë, gjë që i bën të jenë pjesë e listës së shteteve me rrezik të lartë.

Kujtojmë që situata më e rëndë me COVID-19 është në Çeki, Belgjikë e Holandë.