Afërdita Bogiqi, e vetmja grua e zgjedhur në ekzekutivin e Monthey

Afërdita Bogiqi, një storie suksesi në Zvicër

Afërdita Bogiqi, shqiptarja e cila së fundmi është zgjedhur në ekzekutivin e qyteti Monthey, qytet ky prej 18,000 banorësh, transmeton albinfo.ch.

Ajo është gruaja e parë që u bashkua me ekzekutivin e Monthey pas tetë vjetësh pa gra. Duhet theksuar se socialistja e zgjedhur me origjinë kosovare gjithashtu përfaqëson komunitetet e huaja, e cila veçohet si portret i një gruaje të guximshme, transmeton tutje albinfo.ch.

Në Monthey, Afërdita Bogiqi bashkohet me tryezën e një Këshilli Bashkiak që ka mbetur 100% me meshkuj për tetë vjet radhazi.

Kur jemi këtu. duhet theksuar se përkundër faktit se një numër i konsiderueshëm i shqiptarëve kanë arritur të zgjidhen në asambletë komunale dhe një numri më të vogël, edhe në parlamentet e kantoneve, numri i tyre në ekzekutivin e komunave është pothuajse inekzistent. Deri më tani, një post në ekzekutiv ka arritur ta ketë Zari Xhaferi (Zari Dzaferi), i cili në komunën Baar të kantonit të Zug-ut është në krye të sektorit të sigurisë. Afërdita Bogiqi është e dyta.

Mediat zvicerane i kanë dhënë jehonë shqiptares Afërdita Bogiqi, duke e vlerësuar si storie suksesi dhe shembulli më i mirë i një femre, pavarësisht origjinës së saj.

Kujtojmë se Afërdita Bogiqi është lindur në Komoran të Drenicës dhe ardhja e saj në Zvicër ndërlidhet me keqësimin e gjendjes politike në ish-Jugosllavi, si rezultat i drejtpërdrejtë i së cilës ishte ndër tjerash edhe mbyllja e Fakultetit të Ekonomisë në Prishtinë, ku ajo ishte në përfundim e sipër të studimeve të saj.

Sot ajo gëzon suksese të shumta falë punës, vulnetit dhe aktiviteteve të saj të shumta. /Albinfo.ch

---