Punonjësit shëndetësorë duan të dëgjojnë më shumë se “duartrokitje të ngrohta”

Personeli i kujdesit në Zvicër ka filluar një javë protestash për të bërë thirrje për paga më të larta dhe kushte më të mira të punës pasi pandemia Covid-19 vë sektorin shëndetësor nën presion shtesë

Sindikatat dhe grupet e tjera të interesit të kujdesit shëndetësor thonë se “fjalët e ngrohta dhe duartrokitjet nuk janë të mjaftueshme” për një staf gjithnjë e më të rraskapitur në spitale dhe shtëpi.

Ata i nxisin politikanët t’i japin personelit shëndetësor një shpërblim të duhur financiar dhe të sigurojnë masat më të mira të mundshme të sigurisë, shkruajnë mediat zvicerane, përcjell albinfo.ch.

Sindikatat janë të shqetësuara që stafit përsëri mund t’u kërkohet të punojnë ndërrime shtesë të ngjashme me situatën gjatë valës së parë të pandemisë në fillim të këtij viti.

Protestat filluan me një demonstratë në qytetin Neuchâtel, në Zvicrën perëndimore, të hënën dhe do të pasohen nga veprime të ngjashme në vende tjera në të gjithë vendin.

Një tubim i madh është planifikuar të shtunën përpara ndërtesës së parlamentit në kryeqytetin Bern.

Sidoqoftë, vetëm një grup i vogël protestuesish u mblodhën jashtë spitalit Neuchâtel, sipas agjencisë zvicerane të lajmeve, Keystone-SDA.

Një pjesëmarrës sindikalist tha që personeli shëndetësor nuk u lejua të bashkohej me aksionin 90 minutësh.

Tubimet publike dhe private të më shumë se dhjetë njerëzve janë ndaluar në rajon si pjesë e masave për të përmbajtur përhapjen e pandemisë.

---