Numër rekord rastesh: 1278 infeksione për një ditë vetëm në Cyrih

Siç njofton departamenti shëndetësor i Cyrihut, të enjten pasdite në këtë kanton kanë qenë 221 persona në kujdesin spitalor

Numri i infeksioneve të reja në kantonin e Cyrihut ka arritur një rekord të ri.

Në intervalin kohor nga e mërkura deri të enjten, në kantonin më të populluare të Zvicrës janë regjistruar plot 1278 infeksione me virusin corona, transmeton albinfo.ch lajmin e mediave zvicerane.

Katër persona kanë vdekur po nga corona gjatë 24 orëve të fundit.

Numri i njerëzve në trajtim spitalor ka vazhduar të rritet gjatë ditëve të fundit, ashtu si dhe në gjithë Zvicrën.

Siç njofton departamenti shëndetësor i Cyrihut, të enjten pasdite në këtë kanton kanë qenë 221 persona në kujdesin spitalor. Kjo është 20 persona më shumë se një ditë më parë.

Numri i pacientëve të ventiluar është rritur në 21, ose për katër persona më shumë se të mërkurën.

Që nga 1 korriku 2020 në këtë kanton 20.538 njerëz kanë rezultuar pozitivë për koronavirusin, përcjell albinfo.ch. Gjithsej 169 njerëz kanë vdekur gjatë kësaj periudhe.

---