6,126 infeksione të reja dhe 72 vdekje nga Covid-19 në Zvicër

Numri më i madh i të vdekurve, i raportuar gjatë kulmit të valës së parë, në periudhën mars-prill 2020, ka qenë 70!

Zyra Federale e Shëndetit Publik (BAG) ka raportuar 6126 raste të reja me koronavirus.

Mesatarja e 7 ditëve është  7785 raste të reja në ditë, ose 37 për qind më shumë se në javën e kaluar, shkruan srf.ch.

Shkalla e rasteve pozitive në një mesatare 7 ditore aktualisht është 26.4 për qind, transmeton albinfo.ch. Kjo do të thotë se nga 100 teste, mesatarisht 26 teste ishin pozitive.

Numri mesatar ditor i testimeve të bëra në 7 ditët e fundit ka qenë 30,806 në ditë dhe kështu është rritur për 21 për qind në krahasim me javën e mëparshme.

Në 24 orët e fundit janë realizuar 22.157 testime.

BAG ka raportuar sot edhe 72 raste të reja të vdekjeve nga koronavirusi, përcjell albinfo.ch. Të kujtojmë: numri më i madh i të vdekurve gjatë një dite, i raportuar gjatë kulmit të valës së parë, në periudhën mars-prill 2020, ka qenë 70!

Kantonet aktualisht raportojnë 2,909 njerëz që po trajtohen në spitale për Covid-19. Kjo është 42 për qind më shumë se në javën e kaluar.

---