Pfizer vonon shpërndarjen e vaksinave, probleme me temperaturën

Keystone (Alexander Zemlianichenko Jr/ Russian Direct Investment Fund via AP)

Informacionet e fundit tregojnë se dorëzimet e vaksinës së koronavirusit Pfizer / BioNTech janë vonuar në tetë shtete evropiane, pas një problemi logjistik lidhur me temperaturën në të cilën mbahen dozat, sipas autoriteteve spanjolle, përcjell albinfo.ch.

Ministria e Shëndetësisë e Spanjës tha se kishte marrë një mesazh nga fabrika e prodhimit të Pfizer në Puurs, Belgjikë, të dielën vonë, duke thënë se dorëzimi do të mbërrinte të martën në vend se të hënën për shkak të “një problemi në procesin e ngarkimit dhe transportimit në lidhje me kontrollin e temperaturës”.

Nga ana tjetër, autoritetet lokale në Gjermani raportuan gjithashtu vonesa të dielën, pasi u tha se mund të kishte pasur probleme me temperaturën e ruajtjes gjatë tranzitit.

Duhet theksuar se planet e vaksinimit të koronavirusit në Gjermani ndeshën në një pengesë, pasi matësit e temperaturës treguan se disa vaksina të BioNTech-Pfizer mund të mos ishin mbajtur në temperature mjaft të ftohta për shkak të mospërputhjeve me zinxhirin e ftohësve.

“Kur u lexuan matësit e temperaturave që ishin mbyllur në kutitë e ftohta, lindën dyshime në lidhje me përputhjen me zinxhirin e ftohjes”, tha në një deklaratë distrikti Lichtenfels i Bavarisë.

Vaksina BioNTech-Pfizer përdor teknologjinë mARN dhe duhet të ruhet në gati -70 gradë Celsius përpara se të transportohet në kuti të ftohta të mbushura me akull të thatë. Pasi të dalë nga temperaturat ultra të ulëta, vaksina duhet të mbahet në 2° C deri në 8° C për të qëndruar efektive deri në pesë ditë.

Por temperatura në një kuti të ftohtë kishte arritur në 15° C gjatë transportit, tha një zëdhënës i Lichtenfels dhe u prekën rreth 1.000 vaksina. Ai shtoi se ata nuk kishin marrë ndonjë komunikim nga BioNtech se si të procedonin.

Lichtenfels, si dhe distrikte të tjera të Bavarisë, si Coburg, Kronach, Kulmbach, Hof, Bayreuth dhe Wunsiedel po prisnin të mësonin nëse vaksinat mund të përdoreshin ende.