Policia jep detaje: Ja si u gjetën viktimat në shtëpinë e tyre në Viti

Policia e Kosovës në një konferencë për media para vendit të ngjarjes në Pozhoran të Vitisë ku ka ndodhur një krim që tronditi Kosovën tha se janë duke vazhduar hetimet, raporton Albinfo.ch.

Pranë shtëpisë ku ka ndodhur kjo ngjarje tragjike ende shihen ekspertë të forenzikës dhe mjekësisë ligjore të cilët po vazhdojnë të hetojnë detajet e ngjarjes.

Nënkoloneli i Policisë së Kosovës, Remzi Azemi tha se nga hetimet praprake konstatohet se 3 prej viktimave kanë qenë brenda shtëpisë, derisa njëri prej viktimave e që dyshohet se është dorasi, është gjetur i vdekur në kopshtin e shtëpisë.

“Dyshimi i parë është që kryefamiljari ka kryer vrasjen e bashkëshortes dhe djemve e më pas dyshohet se në kopshtin e shtëpisë e ka vrarë veten. Ne ende jemi në fazën fillestare. Ende janë duke punuar ekipet dhe ende nuk kemi informacione lidhur me motivin. Deri më tani kemi intervistuar disa deshmitarë”, tha Azemi, shkruan tutje Albinfo.ch.

Ndërkohë që nga Policia është konfirmuar se dorasi i dyshuar nuk ka pasur më herët ndonjë rast të hapur në Policinë e Kosovës.