Kurti e Osmani vizitojnë veriun e Mitrovicës

Kandidati për kryeministër nga radhët e Vetëvendosjes, i shoqëruar nga u.d e presidentes, Vjosa Osmani, kanë vizituar sot qytetin e Mitrovicës. Ata kanë qëndruar edhe në pjesën veriore të këtij qyteti.

Kurti e Osmani kanë ecur në këmbë përmes urës dhe kanë dalë në veri.
Kjo ka bërë që të ketë forca të shumta të Policisë nëpër rrugë, sidomos tek Ura e Ibrit.

Në disa video të publikuara nga mediat në Kosovë, shihen dhjetëra serbë teksa brohorasin dhe raportohet se ndërprenë vizitën e dy politikanëve kosovarë. Në shoqërinë e Kurti dhe Osmanit shihen edhe kandidatët për deputetë nga lista e përbashkët.

Ndërsa për këtë vizitë është deklaruar Vetëvendosje.

“Atje janë mirëpritur nga qytetarët e Mitrovicës, por pa dyshim jo edhe nga strukturat e Listës Serbe të Beogradit që veprojnë në atë pjesë. Synimet e kësaj të fundit i njohim të gjithë, kë përfaqësojnë dhe kujt i binden. Ky reagim i tyre sot tregon më së miri se Kurti e Osmani, në fakt, janë antipodi edhe i Listës Serbe”, ka deklaruar zëdhënësi i VV-së, Përparim Kryeziu.

Ndërsa raportimet se Kurtit e Osmanit i është ndaluar hyrja nga serbët në veri, Kryeziu i ka quajtur të pavërteta.

“Kryeministri i ardhshëm i Republikës, Albin Kurti, e presidentja e vendit, Vjosa Osmani, kanë vizituar Mitrovicën sot. Vizita nuk është ndërprerë, por është realizuar në plotëni. Pra tubimi i paraparë është mbajtur”, ka shkruar Kryeziu.