Qytetarët vizitojnë Prekazin, në ditët e shënimit të Epopesë së UÇK-së

U bënë 23 vjet nga rënia heroike e Jasharajve, e me këtë filloi shënimi i përvjetshëm i Epopesë së Ushtrisë Çlirimtare të Kosovës.

Për të nderuar të rënët herokisht për liri, shumë qytetarë nga vende të ndryshme të Kosovës, kanë shkuar në Prekaz për të vizituar Kompleksin Memorial “Adem Jashari”, shkruan Albinfo.ch.

Nexhat Rashiti, nga komuna e Shtimes, tha se vizita në Prekaz, i rikujton atij periudhën e luftës dhe i ngjall emocione e ndjenja të tjera.

“Kemi ardhur këtu me familje, për nder të fillimit të Epopesë së UÇK-së, por kjo nuk është e vetmja herë. Shpesh vijmë këtu te Kompleksi i Jasharajve, sepse kjo e rikujton periudhën e luftës për ne. Unë jam gjeneratë e luftës, jam 33 vjeç tash, pak a shumë e kam përjetuar luftën, dhe sa herë që vijmë këtu na ngjallen tjera emocione, tjera ndjenja”.

Ai po ashtu tha se vizita nga të rinjtë e familjes është shumë e rëndësishme, sepse kjo i bënë ata të mësojnë më mirë historinë.

“Për të rinjtë e familjes është rifreskim e mësim, i histories së vendit tonë. Ne kemi edhe familjarë që jetojnë jashtë vendit, dhe ata sa herë që vijnë në Kosovë e vizitojnë këtë vend, sepse këtu është historia e lirisë sonë”, tha Nexhat Rashiti, për Albinfo.ch.

Në anën tjetër, kishte edhe vizitorë që po e shihnin për herë të parë nga afër Kompleksin Memorial “Adem Jashari”.

Zepe Gashi është një e moshuar, e cila kishte ardhur me familje nga qyteti i Pejës, për të vizituar këtë kompleks.

“Jemi ardhur nga Peja, për të vizituar Prekazin. Unë s’kam qenë ndonjëherë më parë, këta familjarët e tjerë kanë qenë edhe më herët. Jam 73 vjeç, dhe po e përjetojë këtë vizitë shumë rëndë. Kjo familje, këta të rënë, janë dëshmi se çfarë ka kaluar populli ynë”, u shprehë ajo me shumë emocione derisa po ecte pranë varrezave të Familjes Jashari.

Aktivitetet për shënimin e Epopesë së Ushtrisë Çlirimtare të Kosovës kanë filluar dje, më 4 mars, dhe do të përmbyllen me koncertin e paraparë të mbahet pa praninë e publikut, më 7 mars 2021, në orën 18:00.